TBC1 kikaangoni kwa kurusha harusi ‘live’

Serikali imeliagiza shirika la utangazaji Tanzania (TBC) kutoa maelezo ya kina baada ya kurusha matangazo ya moja kwa moja sherehe za harusi kwa zaidi ya saa mbili, jambo lililohojiwa a wananchi maeneo mbali mbali hasa katika mitandao ya jamii

Serikali imechukua hatua hiyo baada ya kupata malalamiko mengi  kwa kile kilichokuwa kinarushwa na kituo cha televisheni cha TBC1 cha shirika hilo linaloendeshwa kwa ruzuku kutoka serikalini.

Agizo hilo limetolewa jana na waziri wa habari, utamaduni,sanaa na Michezo, Nape Nnauye ambaye alibainisha kuwa amepokea simu za watu waliokuwa wanahoji juu ya kipindi hicho, hivyo kulazimika kuchukua hatua mara moja za kutaka maelezo kutoka kwa watendaji wa shirika hilo.

Miongoni mwa progamu za burudani na masuala ya kijami, kituo cha TBC1 kinacho kipindi cha chereko ambacho hurushwa kila jumapili kwa matukio ambayo yamerekodiwa, lakini hali ilikua tofauti juzi usiku baada ya sherehe za harusi hiyo kurushwa moja kwa moja.

Kwa urefu wa muda uliotumika kurusha sherehe hizo, watazamaji wengi walishikwa na butwaa hivyo kuzua mijadala kwenye midandao ya kijamii wakihoji inawezekanaje kwa TBC1 kutoa muda mrefu kwa mtu mmoja kwa ajili ya shughuli yake binafsi,

‘’Mtu hawezi kuitumia televisheni ya Taifa kwa matakwa yake, hii ni mali ya umma, kama kila mwenye pesa atakua na uwezo wa kulipia muda wa matangazo si muda wote tutakua tunawaona watu wenye hela tu badala ya vipindi muhimu?’’

Alipotafutwa kuzungumzia suala hilo, Mkurugenzi Mkuu  wa TBC1 , Clement Mshana alisema kwa kifupi kuwa kipindi hicho ni sehemu ya vipindi vya kituo hicho cha televisheni.

“kile ni kipindi cha chereko ambacho tunacho kwenye program zetu,” alisema mshana.

Alipoulizwa ilikuwaje ratiba ya kipindi hicho ikabadiliswa kutoka Jumapili mpaka Jumamosi, alisema; “ Kile ni kipindi cha wikiendi na kama mtu sherehe yake inafanyika siku hiyo, inakuwa haina shida yoyote.”

TBC ni shirika linalomilikiwa na serikali likiwa na televisheni na redio.