Star Tv yamwomba radhi Dk. Mwakyembe na kuahidi kutosoma tena gazeti la Dira katika kituo hicho cha Runinga.

Waziri wa Katiba na Sheria, Dk. Harrison Mwakyembe

Wakati Mhariri wa Gazeti la Dira na mwenzake wako mahakamani kujibu mashtaka ya kuandika na kusambaza taarifa za uongo kwa lengo la kusababisha hofu nchini, uongozi wa StarTV umepiga marufuku gazeti hilo kusomwa asubuhi na kumwomba radhi Waziri wa Katiba na Sheria, Dk. Harrison Mwakyembe kwa usumbufu aliopata kufuatia kituo hicho cha runinga kusoma gazeti la Dira siku ya Jumatatu tarehe 20 Juni, 2016.

 

Taarifa kutoka ndani ya Sahara Media Group Ltd, wamiliki wa StarTV, zimesema msimamo huo ulichuliwa na kiongozi wao mkuu Anthony Diallo jana na taarifa hizo zimethibitishwa leo kwa njia ya simu na Dk. Mwakyembe.

"Ni kweli nimeongea na Diallo, nimeelewa changamoto za kuongoza watu wengi na nimepokea apology yao, jambo ambalo ni uungwana. "Nimefarijika kuwa nao wametambua kuwa gazeti hilo halina viwango, hivyo hawatalisoma tena asubuhi", alisema Dk. Mwakyembe.

Wakati huohuo, Waziri huyo mwandamizi katika Serikali ya Awamu ya Tano amesema maandalizi ya kufungua kesi ya kashfa dhidi ya mmiliki, mhariri, mchapishaji na wasambazaji kwa taarifa za uongo zilizo chapishwa hivi karibuni na gazeti hilo yanaendelea vizuri.

Mhariri wa Gazeti la Dira ya Mtanzania,Bw. Musa Mkama na mwandishi Prince Newton wameachiwa kwa dhamana ya sh. 5 milioni kwa kila mmoja baada ya kupandishwa kortini katika mahakama ya Kisutu kwa kosa la kuandika habari zinazodaiwa kuwa niza uongo na kuleta taharuki katika jamii.