Wananchi wahimizwa kuwa na bima ya afya

 Na.Catherine Sungura,WAMJW-Kagera

Waziri wa Afya,Maendeleo ya Jamii,Jinsia,Wazee na Watoto Ummy Mwalimu amekataza kulipisha pesa za vipimo kwa wagonjwa wote wenye kadi za bima ya afya

Waziri huyo ameyasema hayo wakati akiongea na wananchi walioenda kupata matibabu kwenye kituo cha afya cha rwamishenye

"Ni marufuku kuwalipisha wagonjwa wale wote wenye bima ya mfuko wa afya ya jamii ama tele kwa tele au kadi za bima ya afya labla kama dawa hakuna ndio wanaweza kununua"alisema

Aidha, amewataka wananchi kuhamasishana wenyewe kwa wenyewe hasa wale ambao hawajakata tele kwa tele hasa vijijini ili waweze kupata huduma za afya bila kulipa kila waendapo kupata huduma

"Mnajua hakuna anayejua leo ama kesho ataugua,na magonjwa hayapigi hodi na wakati mwingine yanakukuta hauna akiba ya fedha,ila ukiwa na bima wakati wowote unapata matibabu"

Hatahivyo amewakumbusha watoa huduma za afya kuweza kutoa huduma kwa kufuata kanuni na weledi wao ili kuweza kuondoa malalamiko mengi toka kwa wananchi.

"Mgonjwa anapofika kituo cha afya anakuwa aidha amechanganyikiwa au ana mawazo mengi hivyo anahitaji kauli nzuri,faraja na huduma zinazostahili,hivyo wakuu mganga mkuu wa kituo unatakiwa kukemea na kukumbusha maadili na viapo vya maadili vya watoa huduma"

Aliwasisitizia kuwa bima ya afya ya jamii inawahudumia wanachama sita kwenye familia hivyo itawasaidia hasa pale mtoto anapotimiza umri wa miaka mitano hivyo atahitaji kulipia huduma zote za afya.

Kwa upande wa uzazi wa mpango Waziri Ummy aliwataka akinamama hao wazae kwa kufuata uzazi wa mpango kwani maisha ya siku hizi ni magumu

"Hatusemi kwamba mzae watoto wachache lakini mzae kwa mpangilio,'Mhe.Rais amewezesha elimu bure" ila mtoto anahitaji malezi,maziwa pamoja na malazi.