Idadi ya wanafunzi wanao katisha masomo yatisha huko mkoani Rukwa

picha hii sio halisi

MKURUGENZI wa Halmashauri ya wilaya ya Nkasi mkoani Rukwa, Julius Kaondo amewatahadharisha wazazi  na walez kuwa watamuona mbaya iwapo watashindwa kuwapeleka watoto wao shule kwa madai kuwa hawana uwezo.

Kauli hiyo aliitoa hivi karibuni alipokuwa akisalimiana na wananchi katika ibada maalumu ya kuiombea Serikali ya Awamu ya Tano sambamba na kumshukuru Mwenyezi Mungu kwa kufanyika kwa  uchaguzi mkuu wa Oktoba 25 kwa amani na utulivu .

 Kaondo alisema kuwa  idadi ya watoto waliochaguliwa  kujiunga na Kidato cha Kwanza  Januari mwaka  huu  wilayani Nkasi ni  2,274 sawa na asilimia 67.38.


“Watoto hao wote waliofaulu na kuchaguliwa kujiunga na  Kidato cha Kwanza mwaka  huu  lazima  waende kuripoti  shuleni  kwa  hakuna sababu ya mzazi au mlezi  kushindwa kumpeleka mtoto wake  shule kwa maana tayari Serikali imeondoa ada  na michango  shuleni  kwamaana hiyo  elimu ni bure kuanzia shule ya awali  hadi Kidato cha Nne “ alisisitiza

Ameongeza  kuwa  yeye binafsi hatakua na huruma kwa mzazi yeyote atakayezembea kumpeleka mtoto wake shule na kuwa watendaji wa vijiji na kata watapewa orodha ya watoto hao na watakua na wajibu wa  kuhakikisha kuwa kila mtoto aliyefaulu kuendelea na masomo amekwenda shule ikiwa ni pamoja na kuwachukulia hatua wale wote  watakaoshindwa kutekelezaagizo lake hilo .

Aidha amewataka wazazi  wenye watoto  wanaostahili kuanza darasa la kwanza mwaka huu wawe wameandikishwa  kuanza darasa la kwanza mapema Januari na

 kwamba  mzazi atakayekwenda kinyume na hilo asije akailaumu Serikali kwa maana sheria itachukua mkondo wake.

Alisema kuwa wazazi katika halmashauri hiyo wamekuwa wakishindwa kuwapeleka watoto wao darasa la kwanza na wengine kidato cha kwanza kwamadai kuwa hawana uwezo wa kuwasomesha watoto hao wakidai  gharama kuwa kubwa.

“ Natoa onyo kwa mzazi yeyote atakaye shindwa kumpeleka mtoto wake  shule kwani serikali imesha mgharamia kila mwanafunzi kuanzia wa darasa la kwanza mpaka wa kidato cha nne sasa ole wake mzazi atakaye acha mtoto wake ashindwe kwenda shule….nawaambia tutaonana wabaya ifikapo Februari  ”…. Alisema mkurugenzi huyo
.
Alisema tatizo jingine lililopo wilayani humo  ni  idadi kubwa ya  wanafunzi  kukatiza masomo yao  kutokana na sababu  mbalimbali  ikiwemo utoro , mimba  na  ndoa za utotoni .

Akitoa mfano  alisema  wanafunzi  wapoanza  darasa la kwanza mwaka 2009 wilaya nzima walikuwa  9,600 lakini  ni  wanafunzi  3,452  tu  waliomaliza darasa la saba mwaka 2015 .