JELA MIAKA 30 KWA KUPORA BODABODA.

MAHAKAMA ya Hakimu Mkazi Wilaya ya Kyela, imemuhukumu kifungo cha miaka 30 jela, Mkazi wa Kyela Kati, Malisam Masoud (31), baada yakupatikana na hatia ya kupora pikipiki kwa kutumia silaha, huku wenzake wawili wakiachiwa huru.

Adhabu hiyo ilitolewa juzi na Hakimu Mfawidhi wa Mahakama hiyo,Rhoda Ngimilanga,baada ya kuridhishwa na ushahidi uliotolewa mahakamani hapo na upande wa mashitaka.

Akitoa hukumu katika shauri hilo namba 166 ya mwaka 2014, alisema ametoa adhabu hiyo ili kukomesha vitendo hivyo na kuwa onya wenye nia mbaya ya kutaka kutenda kosa kama hilo waache na wajifunze kuepuka vitendo hivyo.

Ngimilanga alieleza mahakamani hapo kuwa, kosa hilo nikinyume na kifungu cha 287 (2) cha sheria ya kanuni ya adhabu sura ya 16 iliyofanyiwa marekebisho yake mwaka 2012.

Hata hivyo, hakimu huyo alisema baada ya kuchambua kwa kina ushahidi ulioletwa mahakamani hapo, umeshindwa kuwatia hatiani watuhumiwawengine wawili katika kosa hilo, Furaha Alex na Iddy Abdalah (wote wakazi wa Mbeya) kutokana na ushahidi kushindwa kuthibitisha bila kuacha mashaka.

Awali ilielezwa mahakamani hapo na mwendesha mashitaka wapolisi, D/CPL Danford, kuwa mshitakiwa alitenda kosa hilo, Novemba 11 mwaka 2014 majira ya saa moja jioni katika kijiji cha Kikusya, Wilayani humo.

Aliongeza kuwa,kwa lengo la kutenda uovu, mshitakiwa alimkodi mlalamikaji, Bernard Mwaisaka, ambaye ni mwendesha Bodaboda, lakini kwa lengo la kutimiza nia yake ovu mshitakiwa baada ya kufika eneo la Kikusya alimgeuka dereva huyo wa bodaboda na kuanza kumshambulia kwa visu sehemu mbalimbali za mwili wake kabla ya kupora Pikipiki hiyo, yenye usajili wa T 444 CPB aina ya Bajaji Boxer.

Mwendesha mashitaka huyo wa polisi alisema baada ya upelelezi wa kina kufanyika na jeshi la polisi, mshitakiwa alikamatwa eneo la Uyole Jijini Mbeya na wenzake hao wawili wakiwa katika harakati za kuuza pikipiki hiyo.