Wauawa kikatili wakituhumiwa kueneza kipindupindu kwa njia ya kishirikina

Na Moses Ng'wat,

Watu wawili, Geneli Kapwela (65) na Rahab Bungulu (70), wakazi wa kata ya Matema, Wilayani Kyela, wameuawa kikatili kwa kukatwakatwa sehemu mbalimbali ya miili yao na kisha kuchomwa moto,wakituhumiwa kuleta ugonjwa wa kipindupindu kwa njia ya kishirikina kijijini hapo.

Tukio la watu hao kuuawa, ambao ni mume na mke  lilitokea usiku wa Februali mbili, wakiwa wamelala ndani ya nyumba yao walimokuwa wakiishi katika kitongoji cha bulinda katika kata ya Matema, Wilayani Kyela.

Kamanda wa polisi Mkoa wa Mbeya, Ahmed Msangi, alithibitisha kutokea kwa tukio hilo na kwamba jumla ya watu wawili tayari wanashikiliwa na jeshi hilo.

"Katika tukio la kwanza, marehemu Geneli aliuawa kwa kutenganishwa kichwa chake na kiwiliwili na mkono wa kushoto nao kukatwa na viungo hivyo hadi sasa havijulikani vilipo" alifafanua Msangi.

Aliongeza kuwa, baada ya watu hao ambao tayari wawili wamekatwa kutekeleza unyama huo waliamua kuiangusha nyumba ya marehemu hao ambayo ilijengwa kwa nyasi na makuti na kisha kuiwasha moto huku miliili ya marehemu ikitejetea kwa moto.

Aliwataja watu wawili wanaoshikiliwa na jeshi hilo kuwa ni Aliko Mwamtibe (47) na Solomoni Mwamtobe (49) wote wakazi wa kitongoji cha Bulunda.

Akizungumzia tukio hilo wakati akitoa salamu za serikali katika kikao cha baraza la madiwani wa Halmashauri hiyo kilichofanyika jana, Mkuu wa wilaya ya Kyela, Dk. Thea Ntala, aliagiaza jeshi la polisi kuwakamata wahusika wote kwani wapo ambao wamekimbia baada ya kutekeleza unyama huo.

"Hii ni aibu kubwa kwa wilaya yetu kuona kuna watu wanaamini kuwa kipindupindu kinaambukizwa kwa njia ya kishirikiba, wito wangu kwa jeshi la polisi kuhakikisha linawakamata wote waliohusika." alisema Dk. Ntala.

Wilaya ya Kyela ni miongoni mwa wilaya nchini ambazo zimekuwa zikikumbwa na ugonjwa wa kipindupindu mara kwa mara, ambapo tangu ulipuke Disemba mwaka jana jumla ya watu wawili wamepoteza maisha.