Mama mzazi amfungia mwanae ndani mika 10, akidai alizaliwa akiwa na uzito mdogo,

Na Emmanuel Lengwa, Mbozi

mtoto Bahati akiwa amelala katika chumba ambacho alifungiwa

Muandishi  Emmanuel Lengwaakiwa na mtoto Bahati Kaminyonge, baada ya kumtoa katika chumba alichokua amefungiwa

Mwanamke mmoja anashikiliwa na Jeshi la Polisi Wilayani Mbozi kwa tuhuma za kumfanyia ukatiri wa kutisha mwanae wa kuzaa kwa kumfungia ndani ya nyumba kwa miaka kumi bila kumpatia baadhi ya huduma muhimu.

Mkuu wa Wilaya Mbozi Ahamed Namohe alimtaja mwanamke huyo kuwa ni Irene Mwamlima ambaye ni mama mzazi wa mtoto Bahati Kaminyoge (12) anayedaiwa kufanyiwa ukatiri huo.

Akizungumzia suala hilo, Namohe alisema kuwa Wilaya yake imekuwa na matukio mengi ya ukatiri wa watoto, lakini hayaripotiwi kwenye vyombo vya dola ili yafanyiwe kazi.

Namohe alisema kuwa Mwamlima na mumewe aitwaye Ally Kaminyoge wanadaiwa kumfungia mtoto huyo ndani ya nyumba bila kumpatia huduma kama vile malazi mazuri, chakula cha lishe bora na mavazi, hali ambayo alidai kuwa ni ukatiri mkubwa dhidi ya mtoto huyo.

“Mtoto huyo amefanyiwa ukatiri wa kupitiliza na jambo baya zaidi ukatiri huo unafanywa na wazazi wake, matukio haya ni mengi lakini hayaripotiwi, hivyo nitoe wito kwa wananchi kutoa taarifa za ukatiri wa aina hii ili Serikali iweze kuchukua hatua,” alisema Namohe.

muandishi alifika nyumbani kwa Kaminyonge katika nyumba alimokuwa amefungiwa mtoto huyo, na kushuhudia mtoto Bahati akiwa amelazwa chini sakafuni, huku akiwa hana nguo zaidi ya blanketi dogo ambalo hujifunika usiku na mchana kujikinga na baridi.

Aidha kutokana na kutoruhusiwa kutoka nje mtoto huyo alikuwa akijisaidia ndani ya chumba alichofungiwa, hali iliyosababisha aishi katika mazingira machafu, yenye wadudu na harufu kali.

 Akizungumzia suala hilo, Mwenyekiti wa Kituo cha Haki za Binadamu mkoani Mbeya, Said Mohamed alisema kuwa alipata taarifa za kufungiwa ndani kwa mtoto huyo kutoka kwa wasamalia wema na akaamua kuchukua hatua za kuishirikisha Serikali kwenda kumwokoa mtoto huyo.

Alisema kuwa hali aliyoishuhudia kwa mtoto huyo inatisha na kwamba kutokana na ukatiri huo ni lazima wazazi wa mtoto Bahati wachukuliwe hatua za kisheria ili kutoa fundisho kwa watu wengine.

“Ukatiri aliofanyiwa mtoto huyu na wazazi wake hauvumiliki, maana tumemkuta mtoto huyu akiwa ni kama ametupwa kwenye dampo la taka, akiwa hana nguo na amelala sakafuni huku akiwa amejifunika blanketi chafu linalotoa harufu kali ya vinyesi, katika hili ni lazima hatua kali za kisheria zichukuliwe dhidi ya wazazi hawa,” alisema Mohamed.

 Mama mzazi wa mtoto huyo, Irene Mwamlima alisema kuwa mwanaye huyo alizaliwa akiwa na uzito mdogo na baada ya miezi mitatu alibainika kuwa hakui tena!

Alisema kuwa alipompeleka hospitali, aliambiwa kuwa mwanaye huyo ana ulemavu wa akili, hali ambayo ilimlazimu sasa waanze kumfungia ndani kwa madai kuwa akiachwa huru atapotea!

Afisa Maendeleoya Jamii Wilaya ya Mbozi, Edwin Kabambagusha alisema kuwa vitendo hivyo ni ukiukwaji mkubwa wa sheria na  haki za watoto, hivyo ni muhimu jamii nzima ikaungana kuvikemea kwenye maeneo yao.

Alisema kuwa mtuhumiwa huyo atafikishwa mahakamani kwa kuvunja sheria ya mtoto namba 21 ya mwaka 2007, huku akiitaka jamii kuepuka vitendo vya aina hiyo kwa kuwa ni kinyume cha sheria.

Mama mzazi wa mtoto huyo anashikiliwa kwenye kituo kikuu cha Polisi wilayani Mbozi cha Vwawa, akisubiri kufikishwa mahakamani kujibu tuhuma za ukatiri dhidi ya mwanae.