Aliejifanya Daktari na kuingia Hospital ya Rufaa mkoani Morogoro kwa lengo la kutaka kuiba awekwa chini ya ulinzi!!

Mtu mmoja aliefahamika kwa jina la Zakaria Benjamin mwenye umri wa miaka 35, mkazi wa Tungi Manispaa ya Morogoro anashikiliwa na jeshi la polisi kwa tuhuma za kuingia na kujifanya daktari katika Hospitali ya rufaa mkoa wa Morogoro wakati hana taaluma hiyo.

Daktari huyo feki anadaiwa aliingia katika hospitali hiyo ya rufaa Julai 10 mwaka huu majira ya saa 10 alfajiri huku akijifanya kukagua na kutembelea wagonjwa katika wodi mbali mbali hospitalini hapo.

Kamanda wa polisi mkoa wa Morogoro Ulrich Matei amesema daktari huyo alitembelea wodi namba 1,7 na  9 na kujifanya kuwa yeye ni daktari mgeni hivyo anakagua wagonjwa kuona kama wamepata huduma ipasavyo.

Mtuhumiwa huyo alipofika katika wodi namba 7 alienda katika chumba cha kubadilisha nguo kisha kuvalia koti la kidaktari lililokuwa limeegeshwa mahali hapo.

Kamanda Matei amesema mtuhumiwa huyo aliingia hospitalini hapo isivyo kihalali kwa lengo la kutaka kuiba.